manukorero1

(Photo: Tauawhi Bonilla o Te Kura Kaupapa o Ngā Mokopuna i te wāhanga Pei Te Hurinui Jones)

Whakapukepuke ai ngā ngaru o te Rotorua nui a Kahumatamomoe, tērā te auahi ka pupuhi i Tarawera, kai kinikini ai te mamae i te kiri o Tūhourangi kai mātao, o Te Whakarewarewanga o te Ope Taua o Ngāti Wāhiao, o Te Arawa whānui. Haere rā e te pūkōrero, ki te pō uriuri, ki te pō tangotango, ki te iwi ka wehe.

Ko tēnei te tau 50 o ngā whakataetae Manu Kōrero – kua rima tekau tau te whakataetae nei e pātaritari ana i ngā hinengaro, i ngā whakaaro, i ngā mānawa whētukituki o ngā ākonga o ngā kura tuarua huri noa i te motu. Ko Mauriora Kingi (a ia i pōroporoākihia e au) tētahi o ngā pūkōrero i tū ai ki ngā whakataetae Manu Kōrero i te wā i a ia. Ko te tārai[1] i te kupu me te whakakōrero i te tinana te mahi i te wā o Mauriora, koia hoki te mahi i ngā whakataetae o nāianei.

I tū ngā whakataetae a-rohe o Te Whanganui a Tara ki Otaki ki Te Whare Tāonga o Te Papa Tongarewa i ngā rā kua taha, kātahi te rangi whakahihiko ko tērā! He momo tō te ihi, tō te wehi, tō te hiringa[2] o te taiohi Māori. I puta te koa, te auaha, te aue!, te tāmaramara[3] me te māhaki i a rātou. Nō te rangatahi te rā, nō mātou ngā pakeke te maringa nui.

E whā ngā wāhanga o te whakataetae nei, nōku te waimarie i karangahia ai hei kaiwhakawā mo te wāhanga Rāwhiti Ihaka (ngā teina reo Māori). E rima ngā kaikōrero, e whā ngā kaupapa rerekē – me pēnei pea, he maha ngā mata o tēnei o ngā rākau. Ka rangona a kupu whakarite e māringiringi mai ana i te waha, ka kitea a karu e whākanakana mai ana i te kanohi, a tiripou e piupiua ana, a pouwhenua e whakakōrerohia ana. Kei tawhiti rangatahi mā.

Ki te wāhanga Pei te Hurinui Jones (ngā tuakana reo Māori) ka kitea te tūkirikiri a te tāne, te tū mauritau a te kōhine. Ko te tino wero o tēnei wāhanga ko te kōrero tene, me taku mīharo ki te ngāwari o te mākerekere o te kupu me te whakaaro, o ngā taiohi nei. Pakeke mai, kōeke mai, rangatahi mai, he uaua te waihanga i te kauhau i ngā meneti e rima. Me mihi atu ki te kāhui kōrero i koke[4] i te kaupapa nei, i toro atu ki tētahi tino kounga ahakoa tōna taumaha.

Ko te tū ki te reo Māori he tū anō nei kei raro te tangata i te tapu o ngā kōrero ōkawa o te marae. Ko ngā wāhanga reo Pākehā he ōpaki, he ngāwari ake te wairua, he momo whakaari a roto. I rongo au i ngā kōrero mai i ngā tōpitopito o te ao hurihuri e puta ana i ngā kaikōrero o ngā wāhanga Turi Carroll (teina reo Pākehā) me te Korimako (tuakana reo Pākehā). Ko te hauora o te iwi Māori tērā i kōrerohia ai, ko te akiaki i te marea ki te whai i te iti kahurangi, ko ngā pakiwaituhi nō te whenua Haina me te whenua Hapanihi, ko ngā piki me ngā heke o te pukamata, ko te whakahirahira o tēnei taonga te reo Māori, aha ake he kaupapa, aha ake he kaupapa. Ko te kōrero tene te taniwha o te wāhanga pakeke. I eke ētahi, i taumaha ki ētahi engari ko te mea nui i hīkina e rātou te mānuka, i tū rātou ki te mura o te ahi.

Ko te whakakōpanitanga o te rā ko te wāhanga whakawhiwhi taonga. I kaha ngā tamariki o tēnā kura o tēnā kura ki te haka atu, ki te waiata atu, ki te ngeri atu ki ngā toa o te rā. I mīharo atu au ki tētahi momo i kitea. E rua ngā ākonga o Te Kura Kaupapa Māori o Ngā Mokopuna i whakawhiwhia ki ngā tāonga whakaihuwaka[5] mo ngā wāhanga Māori, kāore ngā ākonga o te kura rā i tū ki te haka atu ki a rāua, he noho puku kē te mahi. Nā wai, nā wai ka whakawhiwhia he taonga ki kura kē, ka wawe te tū o ngā tamariki o te kura rā ki te haka atu ki a ia. He aha i tū ai ngā tamariki o Ngā Mokopuna ki te mihi ki ērā atu kura, engari mo te tū ki te haka ki a ia anō? E kīa rā ko te whakaiti te whare o te whakaaro nui[6]. He noho kūmara nō te kura rā i ngū ai rātou. Kātahi te whakaaro rangatira – mihia a kura kē ka whakawhiwhia ki te taonga, waiho atu ma kura kē koe e mihi i tō whakawhiwhinga. Kei tawhiti e Te Kura Kaupapa Māori o Ngā Mokopuna.

Ka rere ngā mihi ki te PPTA me te Kaunihera a Rohe o Pōneke nā rātou te kaupapa i tautoko, ki te komiti whakahaere i hāpai i te taumahatanga o te mahi, ki a Te Papa nōnā te whare, ki ngā mātua me ngā kaiako, ki ngā ākonga katoa i tae ki te mura o te ahi. He mahi uaua, he mahi taumaha te kōrero ki mua i te aroaro o te tangata.

Ko te mihi whakamutunga ki a rātou ngā whakaihuwaka o te whakataetae, kia rātou e whakakanohi ana i te ūpoko o te Ika ki ngā whakataetae Manu Kōrero a Motu hei te Hereturikōkā. Kia Tauawhi Bonilla (Pei te Hurinui Jones) rāua ko Rāhiri Wharerau (Rāwhiti Ihaka) o Te Kura Kaupapa Māori o Ngā Mokopuna,Waimirirangi Lee-Reiri o te Kāreti Kōtiro o te Whanganui-a-Tara (Korimako) rātou ko Taya Heke o Te Kura-ā-Iwi o Whakatupuranga Rua Mano (Turi Carroll), whaia ngā tapuwae o Mauriora Kingi i te wā i a ia, whakaraupāngia te ringaringa, pikihia te maunga, kapohia te iti kahurangi.

NOTE: Ka tuia tēnei tuhinga ki te pūrongo ‘He Muka’ a Te Taura Whiri i te Reo Māori. Ki te hiahia koe i te kape o te pūrongo nei, tukuna tō tono ki Catherine@tetaurawhiri.govt.nz (he pūrongo kore utu).

  • [1] whakawhairo / rāwekeweke
  • [2] whakakipakipa
  • [3] Whakamanawa/māia
  • [4] ‘haere whakamua’
  • [5] te toa o te whakataetae
  • [6] He whakataukī e kī ana ko te hūmarie o te tangata te mātāmua o ngā whakaaro

Haimona Gardiner

HaimonaGardinerHe uri no Te Arawa, no Ngaiterangi no, Ngāti Ranginui hoki, a Haimona Gardiner.

I kuraina ia ki Te Kura Kaupapa Māori o Ruamata ki Rotorua; nā reira i poipoia ai tana hiahia ki te whakaū i te reo Māori hei reo tūturu, hei reo māori tonu i roto i a Aotearoa whānui.

Ko tana aronga nui, he whakatairanga i te ao Māori me ōna āhuatanga hapori, ngā pānga ōhanga, me ngā nekenekehanga torangapū, hei oranga mo te Māori, mo te motu whānui tonu.

 

TAWO adAdvertisement